ಪಡೆದವನೂ ಕೊಡುವವನಾಗಲಿ!!

ಕೊಡುವವರು ಕೊಡುತ್ತಿದ್ದಾರೆ.ಪಡೆಯುವವರು ಪಡೆಯುತ್ತಿದ್ದಾರೆ..!ಕೊಡುವವರಿಗೆ ಕೊಟ್ಟು ಮುಗಿಸಿ ಪುಣ್ಯಗಳಿಸಿದ ಸಂತೋಷ! ಪಡೆಯುವವರಿಗೆ ಮತ್ತಷ್ಟು ಪಡೆಯುವ ಬಗ್ಗೆ ಆಲೋಚನೆ! ಕೊಡು-ತೆಗೆಯುವುದು ಇಂದು ಇಷ್ಟಕ್ಕೆ ಸೀಮಿತವಾಗಿದೆ..! ಪಡೆಯಲು ಅರ್ಹವಾದ ಒಂದು ವರ್ಗ ಅತ್ತ ಪಡೆಯಲೂ ಇಲ್ಲ, ಇತ್ತ ಕೊಡುವ ಸ್ಥಿತಿಯೂ ಅವರಿಗೆ ಒದಗಲಿಲ್ಲ! ಇಲ್ಲಿ ಕೊಡುವವರು ಧಾರಾಳವಾಗಿ ಇದ್ದಾರೆ, ಆದರೆ ತೆಗೆಯುವವರ ಸಂಖೆಯಲ್ಲೇನು ಕಡಿಮೆ ಆಗಿಲ್ಲ! ಹೀಗೆ ಬಡವರನ್ನು ಮೇಲಕ್ಕೆತ್ತುವ ಬಗ್ಗೆ ಆಲೋಚಿಸದೆ ಅಲ್ಪ ಸ್ವಲ್ಪ ಭಿನ್ನ ಭಿನ್ನವಾಗಿ ಕೊಡುತ್ತಿದ್ದರೆ ಇನ್ನು ಸಾವಿರ ವರ್ಷ ಕಳೆದರು ತೆಗೆಯುವವರು ಹಾಗೆಯೇ ಇರುತ್ತಾರೆ, ಅವರಲ್ಲೇನು ಬದಲಾವಣೆ ಆಗುವುದಿಲ್ಲ! ಕೊಡುವವರು ಪಡೆಯುವವರನ್ನು ಕೊಡುವವರಾಗಿ ಮಾರ್ಪಾಡಿಸುವ ರೀತಿಯಲ್ಲಿ ಒಳ್ಳೆಯ ತೀರ್ಮಾನಗಳೊಂದಿಗೆ ಕೊಡಬೇಕು, ಪಡೆಯವವರನ್ನು ಒಂದು ಹಂತಕ್ಕೆ ಬದಲಾಯಿಸಬೇಕು ಎನ್ನುವ ದೂರಾಲೋಚನೆ ಇರಬೇಕು. ಕೊಟ್ಟೆ ಎಂದು ಹೇಳುವುದಕ್ಕೆ ಮಾತ್ರ ಸೀಮತವಾಗಿಸುವ ಕೊಡುವಿಕೆಯಲ್ಲಿ ಸಮಾಜವು ಪರಿವರ್ತನೆಯಾಗದು ದೇವನ ಬಳಿಯೂ ತೋರಿಕೆಗಾಗಿ ಮಾಡಿದ ಕೆಲಸಕ್ಕೆ ಫಲವೂ ಸಿಗದು. ಸಮಾಜದ ನಿರ್ಗತಿಕರನ್ನು ಮೇಲಕ್ಕೆತ್ತಿ ಮತ್ತೆಂದಿಗೂ ಪಡೆಯದಿರುವ ಪರಿಸ್ಥಿತಿಗೆ ಬದಲಾಯಿಸುವ ಭಾವನೆ ಬೆಳೆದು ಬರಬೇಕು. ಒಂದು ಒಳ್ಳೆಯ ವ್ಯವಸ್ಥಿತ ರೀತಿಯಲ್ಲಿ ಕೊಡಲ್ಪಡುವುದು ವಿತರಣೆಯಾಗಬೇಕು, ಆಗ ಸಮಾಜದ ಕೆಲವರನ್ನಾದರೂ ಮೇಲಕ್ಕೆತ್ತಲು ಸಾಧ್ಯ ಮತ್ತ್ತು ಅದು ಕೊಟ್ಟದ್ದರಲ್ಲಿಯೂ ಸಾರ್ಥಕತೆಯ ಭಾವವನ್ನು ತರುವುದರಲ್ಲಿ ಸಂಶಯವಿಲ್ಲ.